قصة مؤثرة : موت على رصيف الغربة

595

Get real time updates directly on you device, subscribe now.

above post content 700×90

– كيفك ياحجه ؟

= الحمد لله يا ابني

– انا جاي عشان خبرك خبر مش حلو

= عارفة الخبر وحسيت فيه من لما دقيت ع الباب

– شو هوي ياحجه ؟

= ابنى يلي بأفريقيا مات صح ؟

– ايه يا حجة .. الله يعطيكي الصحة والبقية فى حياتك

= تفضل فوت اعملك شاي

– شاي شو ياحجه ! عم قلك ابنك مات

= بعرف يا ابني .. ابني ميت من زمان .. بس قلي هوي كيف مات هل المرة؟

– مات هل المرة !! خلص شغل ب الليل وهوي عم يسكر المحل هجموا عليه حرامية بدهم يسرقوه وقاومهم . قاموا قوصوه

= كم ملعقة سكر يا ابني ؟

– رح تجنيني ياحجه بس !! شو يعني ميت من زمان ما فهمتها ؟ شو هل الصبر يلي عندك وطولت البال ؟

= يا ابني .. ما حدا بيهرب من قدره .. أنا عارفة انو ابني رح يموت .. بس كنت بحاول خليه جنبي اطول فترة .. ابني مات من زمان لما اتخرج من الجامعة وما لاقى شغل .. ومات مرة تانية لما حب وحدة وكان بيحلم يتجوزها بس ما قدر يأمن قرض ع الاسكان ليشتري شقة يعيشوا فيها لانه ما عنده واسطة .. ومات مرة لما اشتغل وايتر بمطعم واجت البنت يلي كان يحبها مع خطيبها ابن المسوؤل .. ومات كمان مرة لما ابوه مرض وما قدر يفوته ع مستشفى منيحة . وبعدها شال همي وهم مرضي وهو ما كان معه حق ترويقة .. ومات مرة لما …

– بس يا حجة يرضى عليكي ..

= معك خبر يا ابني .. اخر مرة قبل ما يسافر لما ودعته كنت حاسة انو رح يموت .. سألني شو بك ، قلت له ما في شي بس ما لحقت اشبع منك يا ابني ، قال لي بشهر رمضان رح انزل وبنفطر وبنعيد سوا … نحنا الفقرا يا ابني ما بنفرح ب العيد اكثر شي بنروح الصبح ع المقبرة وبنحسد يلي فيها لانه ارتاحوا من هيدي العيشة … الفقير يا ابني بيرتاح لما يموت الحياة مش حلوة النا

– والله مش عارف شو بدي قول لك ياحجه .. ع كل حال هيدا شيك ب ٥٠٠٠$ من صاحب الشركة يلي ابنك كان يشتغل عنده

= خليهم معك ،وروح فتش ع الشب يلي رح يتغرب بداله .. واعطيه ياهم وقلو ما تحرق قلب امك مثل ما انحرق قلبي

 فايسبوكيات واقعنا الإغترابي

Français