كيف شكل بدّو ينام
(إلى روح الشهيد هادي محمد درويش وكل الشهداء الذين روت دماؤهم التراب المقدّس في الجنوب)
——————————————————————
ما نامْ
يمكن عيونو عالهدا
سدّت شبابيك النعسْ
يمكن ركب ظهر الفرسْ
هالطايرة صوب السما
صوب المدى المشلوح
ع وسع المدى
يمكن فتح بوابة الأسرارْ
وخرطش ع حيطان الوعي
بحروف حمرا مزنَّرة بالنارْ
————–‐———————————————–
كيف شكل بدّو ينامْ
الحامل بقلبو ميذنة
وجراس عم ترنّ
وتاريخ لونو غار منّو الدمّ
ودمعات إمّو الناطرة
ع عتبة عمرها
تا يرجعوا الغيّاب
وتا يختموا دفتر وجعها
الصار وسع الليلْ
كيف شكل بدّو ينام
الماسك بكفّو سنديانة هالجبل
وضحكات شلّعها القهرْ
وصخور عم تجنّ
الزارع على تلال العمرْ
شتلات عزّ متوجّة بالغارْ
—————————–‐——————————-
كيف شكل بدّو ينامْ
هو اللي متلو صعب يتلاقى حدا
هو اللي لما يفوت بِعتمة الليل
حتى يوقف بوجّ العدا
بيزهّر جبينو متل وردة من الجنة
متل عصفور عم يهرب من حبوس الدني
وفرحان بيغنّي
متل شي سيف صارت شفرتو
بتكتب قصايد من ذهبْ
بترسم عرايش من عنبْ
بتشقع مواويل الغضبْ
هو اللي رنة ساعدو بتزرع شرفْ
هو الشرفْ
هو اللي وحدو رافع الميزان
ميزان الشرفْ
وهيدي الأمانة الحاملا
ما غاب عنها ولا انحرفْ
هو اللي قلبو أبيض من التلج
هو اللي روحو أطهر من الطهر
هو اللي زندو أصدق من الوعدْ
هو اللي حامل همّ رفقاتو
كل اللي راحوا وسرّبوا بالليلْ
وهمّ اللي جايي بعدْ
هو العهدْ
هو السعدْ
هو الكرامة الطالعة صوب المجدْ
لفوق لفوق المجدْ
————————————————————-
هيدا اللي عم يرمح على حصان الرعدْ
متل الأسدْ
وجايب بكفّو الطاهرة
كمشة من مواويل سيّجها الحمامْ
هيدا اللي واقف حارس الأيامْ
والأحلامْ
ودمعة يتيمة تمردت ع عين إمو الصابرة
وضحكات الوليدات يا اللي بيكبروا عالسكت
بين الموت
والموت اللي جايي بعدْ
هيدا اللي واقف حارس بواب الكرامة والبطولة والرجولة والسلامْ
كيف شكل بدّو ينامْ
—————————————————————-
د. علي عجمي
